Friday, February 15, 2008

馬來西亞之旅 - 極品團友篇

是次的馬來西亞之旅,竟然給我遇著數件千年難得一見的極品團友,實在令人既「驚」且「喜」。

該數件團友其實是我十叔的朋友,之前也曾經跟他們行過三兩次山兼吃過數次午飯,當時都覺得他們有點「奄尖聲悶」,直覺上不太喜歡他們﹔今次的旅行,更加將我對他們的點點不喜歡轉化為厭惡。

話說他們一行十三人,其中一個師奶L,可能是因為聲大大,人又是行動派的關係,被那十三人冠以「團長」的稱號。師奶團長最喜歡為她的團友大大聲地重覆領隊/導遊的說話,又喜歡大大聲發號司令﹔最最最最最精警的是,十三人中總有一兩件補品(比極品次一級)會低能地走去叫師奶團長解釋領隊.導遊的說話,又或者附和師奶所發的號令。

例子一

領隊:嗱,聽日七點半morning call,九點半o係酒店lobby集合。早餐其實六點半已經開始架喇,所以你地早d起身早d去食都得。
補品甲:咁即係點呀,幾點集合呀。
補品乙:係啦,咁而家即係點呀。幾點起身幾點集合呀。
師奶團長:而家即係七點半morning call,之後係自由時間,九點半先集合。
補品甲:啊......咁即係七點半先起身......
師奶團長:(大聲地)各位團友!聽朝七點半morning call,九點半o係返呢度集合!

另外,那數件極品經常性地以為自己見多識廣,亦順理成章地認為我們一家見識少,樣樣事情都不懂,於是經常自以為是地幫我們安排這安排那,又「教」我們做這做那。其實,最甚麼都不懂的,還是那些極品自己。

例子二

旅程最後一天,有數小時活動時間,極品們提議打的去某食街搵食。接載我們的司機是印度人,待我們安頓好後,殿後的師奶團長便跟印藉司機說「阿羅街!阿羅街!」,印藉司機面無表情的點頭。

車開了沒多久,當我還在疑惑究竟司機先生是否聽得懂師奶團長所說地目的地時,司機先生說了一句:"Where are you going?",並嘗試尋找另外兩輛的士的行蹤以了解我們要到哪裏去。

例子三

極品們和補品們都覺得行程表上列的行程一定要每天跟足,知道行程會前後調動時竟然呱呱大叫。

除此以外,極品們最擅長斤斤計較,貪小便宜,更擅於投訴。

例子四

旅程第二晚,行程安排了坐三輪車,導遊最初說過大概會坐四十五分鐘。當晚由於行程安排問題,集合時間遲了,最後大概坐了半小時。第二天一早,極品們和補品們圍在一起鼓譟,說三輪車不足四十五分鐘,要跟導遊投訴,要求多坐一次,不然就不給導遊費云云。

例子五

旅程第三晚,行程安排了一頓包括在自費活動內的晚餐,嘗嘗當地的特色小吃。本來的安排是八人一桌一份食物,極品們卻如何也要把檯併在一起,又想到自己已付費,便不理人家的安排,不停翻叫又翻叫,最後要導遊自己掏腰包支付額外費用。

其實還有更多例子未能盡錄。想不到短短五天竟然讓我見識到甚麼是極品團友中的極品,實在大開眼界。

8 comments:

Unknown said...

我鐘意你的極品補品分類囉…太強了…

你這個旅程真係夠大開眼界…

Anonymous said...

真係好極品喎!啲補品都差唔多!

遇着咁o既極品都幾慘,會搞到成個行程好冇癮喎。

有冇試過飛起班極品啊?

Anonymous said...

這也是我其中一個不太喜歡參加旅行團的原因,平價的總有極品,而貴價的我去不起.......

遇著呢類團友會令去玩的心情大打折扣呢...

rice said...

小球,你果d真係超超超極品
甘拜下風...

比我呢,一定暗串左佢地先,之後實數臭班賤人

李小球 said...

冰子:班野簡直係宇宙最強,好可怕......
我驚慌鳥

瑩:冇錯,兩者都不相伯仲,好癲喪
直情係冇癮,最慘係佢地係我阿叔的朋友,要成日集體行動......:(

yan: 同屋企人去旅行點都要跟團架喇,我唔介意跟平團,但係唔好搵埋呢d極品朋友做團友就得喇,成件事即刻劣晒

飯飯:唔好話你,連我都甘拜下瘋......
數臭就同我媽同埋表妹做左架喇 :p,不過暗串就不能啦,話晒係我阿叔的朋友,要保持禮貌......

lu said...

旅行團遇著極品/補品是難受的事,但最慘是那些是你叔叔的朋友...

其實你叔叔怎麼會認識到這樣的人呢?嗯...

Anonymous said...

救命呀,去旅行去到佢地咁樣,真係... 唉...
咁樣同蝗蟲有咩分別...?

李小球 said...

lu: 我都唔知點解我阿叔會識著d咁o既人......聽講仲要係識左好耐添架 囧

Johnny仔:我覺得佢地唔應該出門,留o係屋企就好喇,唔好影響市容