生命中不能承受的嚇

今早清潔姐姐來抹檯，先走開一下以方便姐姐工作。等待時老細A跟我聊起來。

老細A：今日唔係好多人著紅衫咋喎。
我：係呀，冇乜人理佢。
老細A：比我想像中少人著囉。
我：我都冇理到佢。我淨係知道政府部門有內部email叫人著紅衫囉......
老細A：我都有喎（說時遲那時快，老細A立刻拉開襯衣領，露出內裏的紅色圓領）
我：（急步步向座位）哈哈哈，我係唔會理佢架。

救命啊，現在回想起也覺得心虛。你要讓我知道你有穿紅衣也不要拉開襯衣領吧......整個場面真的很可怕。天呀，真的夠驚嚇的！我這種年老體弱的人心臟不是太強壯的呀！

做人唔好太低B

（上述標題好像是來自子華兄於某劇集的金句之一，如果錯漏請指正）

晚上去完Slava's Snowshow回家，因為雙腳太累的關係，先窩在沙發休息一會。電視正播著勁多金曲那個甚麼甚麼選拉票活動，部份歌手都要講講自己的心水歌曲。

有一堆歌手都說過以後，便輪到一隊叫"Eternity Girls"的女子組合了，當主持人鄧生問及她們的心水歌曲是哪一首時，她們四人立即興奮地大聲說：「我地的心水係Eason的Crying in the rain!!!」

聽完她們的答案，那一刻我立即呆掉了，再望望電視螢光幕，陳生正在意義不明地笑著。

四位小姐，我只知道陳生的歌叫"Crying in the party"，亦有另一首歌叫"Singing in the rain"，可是我完全不知道陳生有一首新歌叫Crying in the rain!!!!!!!!!!

那一刻，我不住有懷疑那四位小姐是不是真的喜歡這首歌......

週末牢騷碎唸唸

(1)
我想知道，昨晚是不是颱風襲港了，怎麼金鐘站月台會站滿人？下樓梯時見到這個場面我的下巴都嚇到跑掉了......最後要等五班列車才能擠到上車，還沒站穩後面的阿伯又不停的在推撞人，新鞋子還被踩到了！下車的時候又要推開人群才能擠出車廂，真的很！可！怕！

(2) 另，很怕別人站在電梯口不讓人出去，已經說了不好意思還要站在電梯口而完全沒有讓開的意思的人真的超討厭！

(3)
公司開始有聖誕佈置，靜雞雞竄出去買完椰撻菠蘿包回來時見到電梯大堂遍地到乾草閃粉小珠！佈置的人跟聖誕裝飾有仇嗎？

(4)
金鳳茶餐廳的椰撻，跟我心目中的椰撻樣子不一樣。批皮跟餡料很「疏離」，一點也不甜，也沒有椰子味，竟然有點花生味......其實會不會不是椰撻來的呢？

還是雞批最好......

(5)

峰壽司的飛魚子手卷，飛魚子滿瀉！

(6) 看電視時認真地看完小肥大碟的廣告，他那皺著眉閉著眼唱歌的樣子很有趣，嘻嘻。

(7) 又，爸爸在看完小肥廣告後，說了一句：「佢叫咩名話？小咩話？小豬呀？」（我：佢叫小肥呀，小豬！）「哦，小肥豬！」

(8) 唔覺意聽到餅小姐T的歌My cup of tea，好。難。聽。一定不是我杯茶。她那個新形象我已經別不消的了，她唱歌是還要用一把似斷未斷氣的聲音來唱一首比較高音的歌，很難頂。耳朵受難，現在想起也打冷震

(9) 近來好喜歡吃喇沙，在餐牌上一見到就要試，雖然質素真的很參差。還是喜歡灣仔的喇沙店和家附近的喇沙店，超好吃，好喜歡那個湯的味道。

有關Banker的迷思2

中午時份又繼續跟AY同事討論袋鼠馮的「冇cash事件」。經過我們連番詳談，終於得出另一結論。

AY同事: just now they go to buy their lunch, i heard someone said '你有錢丫嘛?'....don't know who said that~
我: really???????? he's so funny~~~~~~
我: 佢應該問清楚: 你有cash丫嘛
AY同事: 應該係..因為答人果個人話: 我用八達通!
AY同事: banker都唔鍾意cash~~
我: 下? 勁喎......終於唔係答: 我用卡
AY同事: d banker 都係鍾意成日調動資金同計 cash flow 架喇
我: 唔係呱......唔通佢日日都要計過自己cash flow/調動下自己d資金先會俾自己用cash???
AY同事: 佢地要maximize capital return, 買幾蚊野都要有兩個月credit terms~
我: 唔係呱......即係佢地兩個月前已經要set 好budget?
我: 唔怪之得佢去外國冇錢用啦......因為個budget唔包括呢樣野在內......
AY同事: 所以佢係 banker 我地唔係囉~~

有關Banker的迷思

晚上跟C同事、JY同事和AY同事吃飯時，說開前身為banker現為公司高級經理的袋鼠．馮公幹不帶現金，還會把別人移民外國才會帶的那種最大的行李箱遺下在酒店時，我們都不禁作出種種推測，笑了一整個晚上。

C同事跟我們說，話說在泰國公幹時，有一天，袋鼠馮問：「你地有冇泰銖可以借住俾我先呀，我冇cash呀。由機場黎酒店果陣我d錢已經用得七七八八喇 (按: 租車的費用是Bht 1,100，約港幣225元)。」最後，袋鼠馮問client借了錢，好像說回港後歸還。

經我們熱烈討論過後，得出以下原因：
(a) 袋鼠馮真的以為他身為某信用卡的卡主就可以「一卡旁身世界通行」
(b) 袋鼠馮為人節儉，每天用多少現金就帶多少現金，不會多也不會少
(c) 袋鼠馮只會出入可使用信用卡的場所
(d) 袋鼠馮身為banker時出差會有人跟出跟入，根本不用付款﹔習慣一時改不了
(e) 袋鼠馮為了人身安全著想，只帶少量現金出差/將大部份現金放在其他人身上﹔習慣一時改不了
(f) 其實袋鼠馮的巨型行李箱全都是金條 (?!)，不過要花時間將金條磨成粉 (?!!) 才能兌成現金 (?!?!?!)，所以一時間周轉不靈
(g) 袋鼠馮家中其實有個百子櫃，每個櫃分別載著世界各地的貨幣和其他必須品如插頭變換器等等，不過剛好泰國那格用完了又沒時間補給/不願捱貴貨幣，於是身上沒有現金

訂房奇談

日期：二零零七年七月二十七日 (星期五)
時間：約下午二時五十分
人物：酒店職員A、B、C、D、E，我

A：Good afternoon Ixxxxx P****** how may I assist you?
我：麻煩你幫我駁去訂房部丫
A：好呀請等等。

(一陣宣傳聲帶)

B：Good after Ixxxxx P******
我：麻煩你我想訂房架。
B：請等等我幫你駁返去訂房部丫

(又一陣宣傳聲帶)

C：Good afternoon Reservation xxx speaking how may I help you?
我：唔該我想訂間房架，7月30 check-in，8月1號check-out。
C：請問公司有冇同我地簽contract呢
我：有，係Dxxxxxxx
C：好，請等等..................................................................................................請問你地公司名係咪D-i-e...
我： (打斷)，唔係，係Dxxxxxxx
C：好，請等等......等我幫你轉去有關的同事幫你丫

(再一陣宣傳聲帶)

D：Good afternoon Sales Office xxxxxxxxxx
我：唔該我想訂間房架，7月30 check-in，8月1號check-out，公司訂o既
D：小姐你間公司名係...
我：Dxxxxxxx
D：好，麻煩請等等

(又再一陣宣傳聲帶)

E：Good afternoon xxxxxxxxxx
我：唔該我想訂間房架，7月30 check-in，8月1號check-out，公司訂o既
E：請問小姐點稱呼呀
我：我姓李o既
E：李小姐，1位入住咕呵？
我：係呀
E：公司全名係...
我：Dxxxxxxx
E：咁呢個房租係八百八十蚊net
我：好丫
E：李小姐呀，唔好意思呀，o岩o岩update左個record 8月30號果日冇房呀
我：8月30號?
E：係呀，7月30號果日呀，o岩o岩update左個record 7月30號果日冇房呀，不如小姐你再問清楚個客人先丫
我：哦，咁唔該晒你先
E：不如小姐你再問清楚個客人先丫...
我：(打斷) 問清楚個客? 即係咩意思呀?
E：因為7月30號冇房呀...
我：(再打斷) 個客人confirm左係7月30號住架喇喎!
E：唔好意思呀，7月30號冇晒房喇
我：咁唔該晒你先啦拜拜!

家陣啲小朋友真係......

呢個post真係唔用廣東話寫唔得。

我覺得而家啲小朋友，或者係拍拖中的女仔真係......唉，唔多得囉。

話說夜晚同朋友仔食完飯坐小巴返屋企，喺總站有一對小情侶上左車。睇佢地個樣應該仲係中學生嚟嘅。好啦，一上到車，個女仔猛話熱熱熱，唔肯坐低之餘仲猛咁"dump"地，仲一邊"dump"地一邊話：「咁熱，咦，熱死人喇。」。個男仔即刻好溫柔好聲好氣咁話：「向晒兩個冷氣口俾你架喇~小巴係咁架喇，坐一陣就涼架喇~」個女仔聽到個男仔咁講，埋怨左一輪之後先嬲爆爆咁坐低，坐低左之後仲繼續郁身郁勢，不停俾說話個男仔聽，仲伸埋隻腳出路口添。

坐喺佢地斜後面一個單邊位嘅我當然全程 (被迫) 望住個女仔發癲啦。個女仔知道我望住佢之後，就繼續面向前面但係將隻眼碌到後面怒睥我囉。當時佢嘅眼神鬼死咁凌厲之餘再配合佢一頭長亂直髮都幾似貞子架。可能佢咁樣射喱眼睥住我比較辛苦呱，睥左一陣就收番佢嘅眼神繼續發脾氣喇。之後全程個女仔都唔俾個男仔掂佢或者黐埋去，而個男仔就繼續鍥而不捨咁嘗試氹返佢個女朋友。

小姐，你由一上車開始就發癲發到我落車都仲嬲爆爆咁，仲要怒睥我喎，想點先。你熱就坐入邊囉，再唔係咪搭的士囉，無謂搵架小巴黎糟質丫。你咁忟咁躁，想唔熱都幾難啦係咪先。