撩阿婆 (II)

承上文，有博友留言說可能我舉的例子太新潮，阿婆未必喜歡，於是昨晚趁晚飯又再展開以下對話：

我：（突然亂入）咁謝賢靚唔靚仔？
婆：後生時就靚仔，而家老咗就唔靚仔喇，紮住條辮肉鬼酸酸咁。
媽：咁人地老啦嘛。
婆：佢老婆狄波拉就幾靚女，老咗都靚。而家肥咗好多呀。你嗰日有冇睇電視呀，佢好老咁喇。
我：咁佢個仔呢？
婆：佢個仔唔靚！
我：佢個仔喎，謝霆鋒呀。
婆：我認得佢個樣但係唔知佢叫咩名。都唔靚仔，老豆後生時靚仔啲。
我：咁佢個孫呢？
婆：唔識喎......
我：胡楓呢？
婆：唔靚仔。

電視剛好在播李克勤的廣告......

媽：咁李克勤呢？你問佢李克勤啦。
婆：（搶答）幾靚仔丫。
我：頭先電視嗰個喎。
媽：佢識李克勤架。
婆：李克勤幾靚仔呀。
我：咁林峯呢？
婆：唔識喎......
我：你睇警察嗰齣呢，三哥個手下呀。
婆：邊個呀，唔識喎

撩阿婆 (I)

遷入極地後，其中一個好處就是跟阿婆（就是我娘的阿娘啦）住得近了，可以三不五時跟阿婆一起吃飯聊天打牌......

上星期五放假，在阿婆家那邊午飯，電視正在播放XX掃毒的預告，於是跟阿婆展開以下對話：

我：婆婆你有冇睇呢套？好唔好睇？
婆：麻麻地啦，好暴露嘅，捉賊又係佢，運毒又係佢，咩都係佢。
我：好暴露？
婆：係呀，捉賊又係佢，運毒又係佢，咩都係佢。
媽：暴力呀。婆婆佢鍾意睇啲勾心鬥角架。
我：哦即係你鍾意睇劉松仁？咁劉松仁靚仔啲定阿公靚仔啲？
婆：（堅定）劉松仁都唔靚仔！！